चौपाई
जदपि नाथ बहु अवगुन मोरें। सेवक प्रभुहि परै जनि भोरें।।
नाथ जीव तव मायाँ मोहा। सो निस्तरइ तुम्हारेहिं छोहा।।
ता पर मैं रघुबीर दोहाई। जानउँ नहिं कछु भजन उपाई।।
सेवक सुत पति मातु भरोसें। रहइ असोच बनइ प्रभु पोसें।।
अस कहि परेउ चरन अकुलाई। निज तनु प्रगटि प्रीति उर छाई।।
तब रघुपति उठाइ उर लावा। निज लोचन जल सींचि जुड़ावा।।
सुनु कपि जियँ मानसि जनि ऊना। तैं मम प्रिय लछिमन ते दूना।।
समदरसी मोहि कह सब कोऊ। सेवक प्रिय अनन्यगति सोऊ।।
दोहा/सोरठा
सो अनन्य जाकें असि मति न टरइ हनुमंत।
मैं सेवक सचराचर रूप स्वामि भगवंत।।3।।
चौपाई
देखि पवन सुत पति अनुकूला। हृदयँ हरष बीती सब सूला।।
नाथ सैल पर कपिपति रहई। सो सुग्रीव दास तव अहई।।
तेहि सन नाथ मयत्री कीजे। दीन जानि तेहि अभय करीजे।।
सो सीता कर खोज कराइहि। जहँ तहँ मरकट कोटि पठाइहि।।
एहि बिधि सकल कथा समुझाई। लिए दुऔ जन पीठि चढ़ाई।।
जब सुग्रीवँ राम कहुँ देखा। अतिसय जन्म धन्य करि लेखा।।
सादर मिलेउ नाइ पद माथा। भैंटेउ अनुज सहित रघुनाथा।।
कपि कर मन बिचार एहि रीती। करिहहिं बिधि मो सन ए प्रीती।।
दोहा/सोरठा
तब हनुमंत उभय दिसि की सब कथा सुनाइ।।
पावक साखी देइ करि जोरी प्रीती दृढ़ाइ।।4।।
चौपाई
jadapi nātha bahu avaguna mōrēṃ. sēvaka prabhuhi parai jani bhōrēṃ..
nātha jīva tava māyāom mōhā. sō nistarai tumhārēhiṃ chōhā..
tā para maiṃ raghubīra dōhāī. jānauom nahiṃ kachu bhajana upāī..
sēvaka suta pati mātu bharōsēṃ. rahai asōca banai prabhu pōsēṃ..
asa kahi parēu carana akulāī. nija tanu pragaṭi prīti ura chāī..
taba raghupati uṭhāi ura lāvā. nija lōcana jala sīṃci juḍaāvā..
sunu kapi jiyaom mānasi jani ūnā. taiṃ mama priya lachimana tē dūnā..
samadarasī mōhi kaha saba kōū. sēvaka priya ananyagati sōū..
चौपाई
dēkhi pavana suta pati anukūlā. hṛdayaom haraṣa bītī saba sūlā..
nātha saila para kapipati rahaī. sō sugrīva dāsa tava ahaī..
tēhi sana nātha mayatrī kījē. dīna jāni tēhi abhaya karījē..
sō sītā kara khōja karāihi. jahaom tahaom marakaṭa kōṭi paṭhāihi..
ēhi bidhi sakala kathā samujhāī. liē duau jana pīṭhi caḍhaāī..
jaba sugrīvaom rāma kahuom dēkhā. atisaya janma dhanya kari lēkhā..
sādara milēu nāi pada māthā. bhaiṃṭēu anuja sahita raghunāthā..
kapi kara mana bicāra ēhi rītī. karihahiṃ bidhi mō sana ē prītī..
