चौपाई
सरद मयंक बदन छबि सींवा। चारु कपोल चिबुक दर ग्रीवा।।
अधर अरुन रद सुंदर नासा। बिधु कर निकर बिनिंदक हासा।।
नव अबुंज अंबक छबि नीकी। चितवनि ललित भावँती जी की।।
भुकुटि मनोज चाप छबि हारी। तिलक ललाट पटल दुतिकारी।।
कुंडल मकर मुकुट सिर भ्राजा। कुटिल केस जनु मधुप समाजा।।
उर श्रीबत्स रुचिर बनमाला। पदिक हार भूषन मनिजाला।।
केहरि कंधर चारु जनेउ। बाहु बिभूषन सुंदर तेऊ।।
करि कर सरि सुभग भुजदंडा। कटि निषंग कर सर कोदंडा।।
दोहा/सोरठा
तडित बिनिंदक पीत पट उदर रेख बर तीनि।।
नाभि मनोहर लेति जनु जमुन भवँर छबि छीनि।।147।।
चौपाई
पद राजीव बरनि नहि जाहीं। मुनि मन मधुप बसहिं जेन्ह माहीं।।
बाम भाग सोभति अनुकूला। आदिसक्ति छबिनिधि जगमूला।।
जासु अंस उपजहिं गुनखानी। अगनित लच्छि उमा ब्रह्मानी।।
भृकुटि बिलास जासु जग होई। राम बाम दिसि सीता सोई।।
छबिसमुद्र हरि रूप बिलोकी। एकटक रहे नयन पट रोकी।।
चितवहिं सादर रूप अनूपा। तृप्ति न मानहिं मनु सतरूपा।।
हरष बिबस तन दसा भुलानी। परे दंड इव गहि पद पानी।।
सिर परसे प्रभु निज कर कंजा। तुरत उठाए करुनापुंजा।।
दोहा/सोरठा
बोले कृपानिधान पुनि अति प्रसन्न मोहि जानि।
मागहु बर जोइ भाव मन महादानि अनुमानि।।148।।
चौपाई
sarada mayaṃka badana chabi sīṃvā. cāru kapōla cibuka dara grīvā..
adhara aruna rada suṃdara nāsā. bidhu kara nikara biniṃdaka hāsā..
nava abuṃja aṃbaka chabi nīkī. citavani lalita bhāvaomtī jī kī..
bhukuṭi manōja cāpa chabi hārī. tilaka lalāṭa paṭala dutikārī..
kuṃḍala makara mukuṭa sira bhrājā. kuṭila kēsa janu madhupa samājā..
ura śrībatsa rucira banamālā. padika hāra bhūṣana manijālā..
kēhari kaṃdhara cāru janēu. bāhu bibhūṣana suṃdara tēū..
kari kara sari subhaga bhujadaṃḍā. kaṭi niṣaṃga kara sara kōdaṃḍā..
चौपाई
pada rājīva barani nahi jāhīṃ. muni mana madhupa basahiṃ jēnha māhīṃ..
bāma bhāga sōbhati anukūlā. ādisakti chabinidhi jagamūlā..
jāsu aṃsa upajahiṃ gunakhānī. aganita lacchi umā brahmānī..
bhṛkuṭi bilāsa jāsu jaga hōī. rāma bāma disi sītā sōī..
chabisamudra hari rūpa bilōkī. ēkaṭaka rahē nayana paṭa rōkī..
citavahiṃ sādara rūpa anūpā. tṛpti na mānahiṃ manu satarūpā..
haraṣa bibasa tana dasā bhulānī. parē daṃḍa iva gahi pada pānī..
sira parasē prabhu nija kara kaṃjā. turata uṭhāē karunāpuṃjā..
