चौपाई
सबु प्रसंगु गिरिपतिहि सुनावा। मदन दहन सुनि अति दुखु पावा।।
बहुरि कहेउ रति कर बरदाना। सुनि हिमवंत बहुत सुखु माना।।
हृदयँ बिचारि संभु प्रभुताई। सादर मुनिबर लिए बोलाई।।
सुदिनु सुनखतु सुघरी सोचाई। बेगि बेदबिधि लगन धराई।।
पत्री सप्तरिषिन्ह सोइ दीन्ही। गहि पद बिनय हिमाचल कीन्ही।।
जाइ बिधिहि दीन्हि सो पाती। बाचत प्रीति न हृदयँ समाती।।
लगन बाचि अज सबहि सुनाई। हरषे मुनि सब सुर समुदाई।।
सुमन बृष्टि नभ बाजन बाजे। मंगल कलस दसहुँ दिसि साजे।।
दोहा/सोरठा
लगे सँवारन सकल सुर बाहन बिबिध बिमान।
होहि सगुन मंगल सुभद करहिं अपछरा गान।।91।।
चौपाई
सिवहि संभु गन करहिं सिंगारा। जटा मुकुट अहि मौरु सँवारा।।
कुंडल कंकन पहिरे ब्याला। तन बिभूति पट केहरि छाला।।
ससि ललाट सुंदर सिर गंगा। नयन तीनि उपबीत भुजंगा।।
गरल कंठ उर नर सिर माला। असिव बेष सिवधाम कृपाला।।
कर त्रिसूल अरु डमरु बिराजा। चले बसहँ चढ़ि बाजहिं बाजा।।
देखि सिवहि सुरत्रिय मुसुकाहीं। बर लायक दुलहिनि जग नाहीं।।
बिष्नु बिरंचि आदि सुरब्राता। चढ़ि चढ़ि बाहन चले बराता।।
सुर समाज सब भाँति अनूपा। नहिं बरात दूलह अनुरूपा।।
दोहा/सोरठा
बिष्नु कहा अस बिहसि तब बोलि सकल दिसिराज।
बिलग बिलग होइ चलहु सब निज निज सहित समाज।।92।।
चौपाई
sabu prasaṃgu giripatihi sunāvā. madana dahana suni ati dukhu pāvā..
bahuri kahēu rati kara baradānā. suni himavaṃta bahuta sukhu mānā..
hṛdayaom bicāri saṃbhu prabhutāī. sādara munibara liē bōlāī..
sudinu sunakhatu sugharī sōcāī. bēgi bēdabidhi lagana dharāī..
patrī saptariṣinha sōi dīnhī. gahi pada binaya himācala kīnhī..
jāi bidhihi dīnhi sō pātī. bācata prīti na hṛdayaom samātī..
lagana bāci aja sabahi sunāī. haraṣē muni saba sura samudāī..
sumana bṛṣṭi nabha bājana bājē. maṃgala kalasa dasahuom disi sājē..
चौपाई
sivahi saṃbhu gana karahiṃ siṃgārā. jaṭā mukuṭa ahi mauru saomvārā..
kuṃḍala kaṃkana pahirē byālā. tana bibhūti paṭa kēhari chālā..
sasi lalāṭa suṃdara sira gaṃgā. nayana tīni upabīta bhujaṃgā..
garala kaṃṭha ura nara sira mālā. asiva bēṣa sivadhāma kṛpālā..
kara trisūla aru ḍamaru birājā. calē basahaom caḍhai bājahiṃ bājā..
dēkhi sivahi suratriya musukāhīṃ. bara lāyaka dulahini jaga nāhīṃ..
biṣnu biraṃci ādi surabrātā. caḍhai caḍhai bāhana calē barātā..
sura samāja saba bhāomti anūpā. nahiṃ barāta dūlaha anurūpā..
