चौपाई
सुनि सत्रुघुन मातु कुटिलाई। जरहिं गात रिस कछु न बसाई।।
तेहि अवसर कुबरी तहँ आई। बसन बिभूषन बिबिध बनाई।।
लखि रिस भरेउ लखन लघु भाई। बरत अनल घृत आहुति पाई।।
हुमगि लात तकि कूबर मारा। परि मुह भर महि करत पुकारा।।
कूबर टूटेउ फूट कपारू। दलित दसन मुख रुधिर प्रचारू।।
आह दइअ मैं काह नसावा। करत नीक फलु अनइस पावा।।
सुनि रिपुहन लखि नख सिख खोटी। लगे घसीटन धरि धरि झोंटी।।
भरत दयानिधि दीन्हि छड़ाई। कौसल्या पहिं गे दोउ भाई।।
दोहा/सोरठा
मलिन बसन बिबरन बिकल कृस सरीर दुख भार।
कनक कलप बर बेलि बन मानहुँ हनी तुसार।।163।।
चौपाई
भरतहि देखि मातु उठि धाई। मुरुछित अवनि परी झइँ आई।।
देखत भरतु बिकल भए भारी। परे चरन तन दसा बिसारी।।
मातु तात कहँ देहि देखाई। कहँ सिय रामु लखनु दोउ भाई।।
कैकइ कत जनमी जग माझा। जौं जनमि त भइ काहे न बाँझा।।
कुल कलंकु जेहिं जनमेउ मोही। अपजस भाजन प्रियजन द्रोही।।
को तिभुवन मोहि सरिस अभागी। गति असि तोरि मातु जेहि लागी।।
पितु सुरपुर बन रघुबर केतू। मैं केवल सब अनरथ हेतु।।
धिग मोहि भयउँ बेनु बन आगी। दुसह दाह दुख दूषन भागी।।
दोहा/सोरठा
मातु भरत के बचन मृदु सुनि सुनि उठी सँभारि।।
लिए उठाइ लगाइ उर लोचन मोचति बारि।।164।।
चौपाई
suni satrughuna mātu kuṭilāī. jarahiṃ gāta risa kachu na basāī..
tēhi avasara kubarī tahaom āī. basana bibhūṣana bibidha banāī..
lakhi risa bharēu lakhana laghu bhāī. barata anala ghṛta āhuti pāī..
humagi lāta taki kūbara mārā. pari muha bhara mahi karata pukārā..
kūbara ṭūṭēu phūṭa kapārū. dalita dasana mukha rudhira pracārū..
āha daia maiṃ kāha nasāvā. karata nīka phalu anaisa pāvā..
suni ripuhana lakhi nakha sikha khōṭī. lagē ghasīṭana dhari dhari jhōṃṭī..
bharata dayānidhi dīnhi chaḍaāī. kausalyā pahiṃ gē dōu bhāī..
चौपाई
bharatahi dēkhi mātu uṭhi dhāī. muruchita avani parī jhaiom āī..
dēkhata bharatu bikala bhaē bhārī. parē carana tana dasā bisārī..
mātu tāta kahaom dēhi dēkhāī. kahaom siya rāmu lakhanu dōu bhāī..
kaikai kata janamī jaga mājhā. jauṃ janami ta bhai kāhē na bāomjhā..
kula kalaṃku jēhiṃ janamēu mōhī. apajasa bhājana priyajana drōhī..
kō tibhuvana mōhi sarisa abhāgī. gati asi tōri mātu jēhi lāgī..
pitu surapura bana raghubara kētū. maiṃ kēvala saba anaratha hētu..
dhiga mōhi bhayauom bēnu bana āgī. dusaha dāha dukha dūṣana bhāgī..
