चौपाई
सुनि तन पुलकि नयन भरि बारी। बोले भरतु धीर धरि भारी।।
प्रभु प्रिय पूज्य पिता सम आपू। कुलगुरु सम हित माय न बापू।।
कौसिकादि मुनि सचिव समाजू। ग्यान अंबुनिधि आपुनु आजू।।
सिसु सेवक आयसु अनुगामी। जानि मोहि सिख देइअ स्वामी।।
एहिं समाज थल बूझब राउर। मौन मलिन मैं बोलब बाउर।।
छोटे बदन कहउँ बड़ि बाता। छमब तात लखि बाम बिधाता।।
आगम निगम प्रसिद्ध पुराना। सेवाधरमु कठिन जगु जाना।।
स्वामि धरम स्वारथहि बिरोधू। बैरु अंध प्रेमहि न प्रबोधू।।
दोहा/सोरठा
राखि राम रुख धरमु ब्रतु पराधीन मोहि जानि।
सब कें संमत सर्ब हित करिअ पेमु पहिचानि।।293।।
चौपाई
भरत बचन सुनि देखि सुभाऊ। सहित समाज सराहत राऊ।।
सुगम अगम मृदु मंजु कठोरे। अरथु अमित अति आखर थोरे।।
ज्यौ मुख मुकुर मुकुरु निज पानी। गहि न जाइ अस अदभुत बानी।।
भूप भरत मुनि सहित समाजू। गे जहँ बिबुध कुमुद द्विजराजू।।
सुनि सुधि सोच बिकल सब लोगा। मनहुँ मीनगन नव जल जोगा।।
देवँ प्रथम कुलगुर गति देखी। निरखि बिदेह सनेह बिसेषी।।
राम भगतिमय भरतु निहारे। सुर स्वारथी हहरि हियँ हारे।।
सब कोउ राम पेममय पेखा। भउ अलेख सोच बस लेखा।।
दोहा/सोरठा
रामु सनेह सकोच बस कह ससोच सुरराज।
रचहु प्रपंचहि पंच मिलि नाहिं त भयउ अकाजु।।294।।
चौपाई
suni tana pulaki nayana bhari bārī. bōlē bharatu dhīra dhari bhārī..
prabhu priya pūjya pitā sama āpū. kulaguru sama hita māya na bāpū..
kausikādi muni saciva samājū. gyāna aṃbunidhi āpunu ājū..
sisu sēvaka āyasu anugāmī. jāni mōhi sikha dēia svāmī..
ēhiṃ samāja thala būjhaba rāura. mauna malina maiṃ bōlaba bāura..
chōṭē badana kahauom baḍai bātā. chamaba tāta lakhi bāma bidhātā..
āgama nigama prasiddha purānā. sēvādharamu kaṭhina jagu jānā..
svāmi dharama svārathahi birōdhū. bairu aṃdha prēmahi na prabōdhū..
चौपाई
bharata bacana suni dēkhi subhāū. sahita samāja sarāhata rāū..
sugama agama mṛdu maṃju kaṭhōrē. arathu amita ati ākhara thōrē..
jyau mukha mukura mukuru nija pānī. gahi na jāi asa adabhuta bānī..
bhūpa bharata muni sahita samājū. gē jahaom bibudha kumuda dvijarājū..
suni sudhi sōca bikala saba lōgā. manahuom mīnagana nava jala jōgā..
dēvaom prathama kulagura gati dēkhī. nirakhi bidēha sanēha bisēṣī..
rāma bhagatimaya bharatu nihārē. sura svārathī hahari hiyaom hārē..
saba kōu rāma pēmamaya pēkhā. bhau alēkha sōca basa lēkhā..
