चौपाई
पुनि सप्रेम बोलेउ खगराऊ। जौं कृपाल मोहि ऊपर भाऊ।।
नाथ मोहि निज सेवक जानी। सप्त प्रस्न कहहु बखानी।।
प्रथमहिं कहहु नाथ मतिधीरा। सब ते दुर्लभ कवन सरीरा।।
बड़ दुख कवन कवन सुख भारी। सोउ संछेपहिं कहहु बिचारी।।
संत असंत मरम तुम्ह जानहु। तिन्ह कर सहज सुभाव बखानहु।।
कवन पुन्य श्रुति बिदित बिसाला। कहहु कवन अघ परम कराला।।
मानस रोग कहहु समुझाई। तुम्ह सर्बग्य कृपा अधिकाई।।
तात सुनहु सादर अति प्रीती। मैं संछेप कहउँ यह नीती।।
नर तन सम नहिं कवनिउ देही। जीव चराचर जाचत तेही।।
नरग स्वर्ग अपबर्ग निसेनी। ग्यान बिराग भगति सुभ देनी।।
सो तनु धरि हरि भजहिं न जे नर। होहिं बिषय रत मंद मंद तर।।
काँच किरिच बदलें ते लेही। कर ते डारि परस मनि देहीं।।
नहिं दरिद्र सम दुख जग माहीं। संत मिलन सम सुख जग नाहीं।।
पर उपकार बचन मन काया। संत सहज सुभाउ खगराया।।
संत सहहिं दुख परहित लागी। परदुख हेतु असंत अभागी।।
भूर्ज तरू सम संत कृपाला। परहित निति सह बिपति बिसाला।।
सन इव खल पर बंधन करई। खाल कढ़ाइ बिपति सहि मरई।।
खल बिनु स्वारथ पर अपकारी। अहि मूषक इव सुनु उरगारी।।
पर संपदा बिनासि नसाहीं। जिमि ससि हति हिम उपल बिलाहीं।।
दुष्ट उदय जग आरति हेतू। जथा प्रसिद्ध अधम ग्रह केतू।।
संत उदय संतत सुखकारी। बिस्व सुखद जिमि इंदु तमारी।।
परम धर्म श्रुति बिदित अहिंसा। पर निंदा सम अघ न गरीसा।।
हर गुर निंदक दादुर होई। जन्म सहस्त्र पाव तन सोई।।
द्विज निंदक बहु नरक भोग करि। जग जनमइ बायस सरीर धरि।।
सुर श्रुति निंदक जे अभिमानी। रौरव नरक परहिं ते प्रानी।।
होहिं उलूक संत निंदा रत। मोह निसा प्रिय ग्यान भानु गत।।
सब के निंदा जे जड़ करहीं। ते चमगादुर होइ अवतरहीं।।
सुनहु तात अब मानस रोगा। जिन्ह ते दुख पावहिं सब लोगा।।
मोह सकल ब्याधिन्ह कर मूला। तिन्ह ते पुनि उपजहिं बहु सूला।।
काम बात कफ लोभ अपारा। क्रोध पित्त नित छाती जारा।।
प्रीति करहिं जौं तीनिउ भाई। उपजइ सन्यपात दुखदाई।।
बिषय मनोरथ दुर्गम नाना। ते सब सूल नाम को जाना।।
ममता दादु कंडु इरषाई। हरष बिषाद गरह बहुताई।।
पर सुख देखि जरनि सोइ छई। कुष्ट दुष्टता मन कुटिलई।।
अहंकार अति दुखद डमरुआ। दंभ कपट मद मान नेहरुआ।।
तृस्ना उदरबृद्धि अति भारी। त्रिबिध ईषना तरुन तिजारी।।
जुग बिधि ज्वर मत्सर अबिबेका। कहँ लागि कहौं कुरोग अनेका।।
चौपाई
एहि बिधि सकल जीव जग रोगी। सोक हरष भय प्रीति बियोगी।।
मानक रोग कछुक मैं गाए। हहिं सब कें लखि बिरलेन्ह पाए।।
जाने ते छीजहिं कछु पापी। नास न पावहिं जन परितापी।।
बिषय कुपथ्य पाइ अंकुरे। मुनिहु हृदयँ का नर बापुरे।।
राम कृपाँ नासहि सब रोगा। जौं एहि भाँति बनै संयोगा।।
सदगुर बैद बचन बिस्वासा। संजम यह न बिषय कै आसा।।
रघुपति भगति सजीवन मूरी। अनूपान श्रद्धा मति पूरी।।
एहि बिधि भलेहिं सो रोग नसाहीं। नाहिं त जतन कोटि नहिं जाहीं।।
जानिअ तब मन बिरुज गोसाँई। जब उर बल बिराग अधिकाई।।
सुमति छुधा बाढ़इ नित नई। बिषय आस दुर्बलता गई।।
बिमल ग्यान जल जब सो नहाई। तब रह राम भगति उर छाई।।
सिव अज सुक सनकादिक नारद। जे मुनि ब्रह्म बिचार बिसारद।।
सब कर मत खगनायक एहा। करिअ राम पद पंकज नेहा।।
श्रुति पुरान सब ग्रंथ कहाहीं। रघुपति भगति बिना सुख नाहीं।।
कमठ पीठ जामहिं बरु बारा। बंध्या सुत बरु काहुहि मारा।।
फूलहिं नभ बरु बहुबिधि फूला। जीव न लह सुख हरि प्रतिकूला।।
तृषा जाइ बरु मृगजल पाना। बरु जामहिं सस सीस बिषाना।।
अंधकारु बरु रबिहि नसावै। राम बिमुख न जीव सुख पावै।।
हिम ते अनल प्रगट बरु होई। बिमुख राम सुख पाव न कोई।।
दोहा/सोरठा
उबारि मथें घृत होइ बरु सिकता ते बरु तेल।
बिनु हरि भजन न भव तरिअ यह सिद्धांत अपेल।।122(क)।।
मसकहि करइ बिंरंचि प्रभु अजहि मसक ते हीन।
अस बिचारि तजि संसय रामहि भजहिं प्रबीन।।122(ख)।।
श्लोक
विनिच्श्रितं वदामि ते न अन्यथा वचांसि मे।
हरिं नरा भजन्ति येऽतिदुस्तरं तरन्ति ते।।122(ग)।।
चौपाई
puni saprēma bōlēu khagarāū. jauṃ kṛpāla mōhi ūpara bhāū..
nātha mōhi nija sēvaka jānī. sapta prasna kahahu bakhānī..
prathamahiṃ kahahu nātha matidhīrā. saba tē durlabha kavana sarīrā..
baḍa dukha kavana kavana sukha bhārī. sōu saṃchēpahiṃ kahahu bicārī..
saṃta asaṃta marama tumha jānahu. tinha kara sahaja subhāva bakhānahu..
kavana punya śruti bidita bisālā. kahahu kavana agha parama karālā..
mānasa rōga kahahu samujhāī. tumha sarbagya kṛpā adhikāī..
tāta sunahu sādara ati prītī. maiṃ saṃchēpa kahauom yaha nītī..
nara tana sama nahiṃ kavaniu dēhī. jīva carācara jācata tēhī..
naraga svarga apabarga nisēnī. gyāna birāga bhagati subha dēnī..
sō tanu dhari hari bhajahiṃ na jē nara. hōhiṃ biṣaya rata maṃda maṃda tara..
kāomca kirica badalēṃ tē lēhī. kara tē ḍāri parasa mani dēhīṃ..
nahiṃ daridra sama dukha jaga māhīṃ. saṃta milana sama sukha jaga nāhīṃ..
para upakāra bacana mana kāyā. saṃta sahaja subhāu khagarāyā..
saṃta sahahiṃ dukha parahita lāgī. paradukha hētu asaṃta abhāgī..
bhūrja tarū sama saṃta kṛpālā. parahita niti saha bipati bisālā..
sana iva khala para baṃdhana karaī. khāla kaḍhaāi bipati sahi maraī..
khala binu svāratha para apakārī. ahi mūṣaka iva sunu uragārī..
para saṃpadā bināsi nasāhīṃ. jimi sasi hati hima upala bilāhīṃ..
duṣṭa udaya jaga ārati hētū. jathā prasiddha adhama graha kētū..
saṃta udaya saṃtata sukhakārī. bisva sukhada jimi iṃdu tamārī..
parama dharma śruti bidita ahiṃsā. para niṃdā sama agha na garīsā..
hara gura niṃdaka dādura hōī. janma sahastra pāva tana sōī..
dvija niṃdaka bahu naraka bhōga kari. jaga janamai bāyasa sarīra dhari..
sura śruti niṃdaka jē abhimānī. raurava naraka parahiṃ tē prānī..
hōhiṃ ulūka saṃta niṃdā rata. mōha nisā priya gyāna bhānu gata..
saba kē niṃdā jē jaḍa karahīṃ. tē camagādura hōi avatarahīṃ..
sunahu tāta aba mānasa rōgā. jinha tē dukha pāvahiṃ saba lōgā..
mōha sakala byādhinha kara mūlā. tinha tē puni upajahiṃ bahu sūlā..
kāma bāta kapha lōbha apārā. krōdha pitta nita chātī jārā..
prīti karahiṃ jauṃ tīniu bhāī. upajai sanyapāta dukhadāī..
biṣaya manōratha durgama nānā. tē saba sūla nāma kō jānā..
mamatā dādu kaṃḍu iraṣāī. haraṣa biṣāda garaha bahutāī..
para sukha dēkhi jarani sōi chaī. kuṣṭa duṣṭatā mana kuṭilaī..
ahaṃkāra ati dukhada ḍamaruā. daṃbha kapaṭa mada māna nēharuā..
tṛsnā udarabṛddhi ati bhārī. tribidha īṣanā taruna tijārī..
juga bidhi jvara matsara abibēkā. kahaom lāgi kahauṃ kurōga anēkā..
चौपाई
ēhi bidhi sakala jīva jaga rōgī. sōka haraṣa bhaya prīti biyōgī..
mānaka rōga kachuka maiṃ gāē. hahiṃ saba kēṃ lakhi biralēnha pāē..
jānē tē chījahiṃ kachu pāpī. nāsa na pāvahiṃ jana paritāpī..
biṣaya kupathya pāi aṃkurē. munihu hṛdayaom kā nara bāpurē..
rāma kṛpāom nāsahi saba rōgā. jauṃ ēhi bhāomti banai saṃyōgā..
sadagura baida bacana bisvāsā. saṃjama yaha na biṣaya kai āsā..
raghupati bhagati sajīvana mūrī. anūpāna śraddhā mati pūrī..
ēhi bidhi bhalēhiṃ sō rōga nasāhīṃ. nāhiṃ ta jatana kōṭi nahiṃ jāhīṃ..
jānia taba mana biruja gōsāomī. jaba ura bala birāga adhikāī..
sumati chudhā bāḍhai nita naī. biṣaya āsa durbalatā gaī..
bimala gyāna jala jaba sō nahāī. taba raha rāma bhagati ura chāī..
siva aja suka sanakādika nārada. jē muni brahma bicāra bisārada..
saba kara mata khaganāyaka ēhā. karia rāma pada paṃkaja nēhā..
śruti purāna saba graṃtha kahāhīṃ. raghupati bhagati binā sukha nāhīṃ..
kamaṭha pīṭha jāmahiṃ baru bārā. baṃdhyā suta baru kāhuhi mārā..
phūlahiṃ nabha baru bahubidhi phūlā. jīva na laha sukha hari pratikūlā..
tṛṣā jāi baru mṛgajala pānā. baru jāmahiṃ sasa sīsa biṣānā..
aṃdhakāru baru rabihi nasāvai. rāma bimukha na jīva sukha pāvai..
hima tē anala pragaṭa baru hōī. bimukha rāma sukha pāva na kōī..
दोहा/सोरठा
ubāri mathēṃ ghṛta hōi baru sikatā tē baru tēla.
binu hari bhajana na bhava taria yaha siddhāṃta apēla..122ka..
masakahi karai biṃraṃci prabhu ajahi masaka tē hīna.
asa bicāri taji saṃsaya rāmahi bhajahiṃ prabīna..122kha..
श्लोक
vinicśritaṃ vadāmi tē na anyathā vacāṃsi mē.
hariṃ narā bhajanti yē.tidustaraṃ taranti tē..122ga..
