चौपाई
जौं परलोक इहाँ सुख चहहू। सुनि मम बचन ह्रृदयँ दृढ़ गहहू।।
सुलभ सुखद मारग यह भाई। भगति मोरि पुरान श्रुति गाई।।
ग्यान अगम प्रत्यूह अनेका। साधन कठिन न मन कहुँ टेका।।
करत कष्ट बहु पावइ कोऊ। भक्ति हीन मोहि प्रिय नहिं सोऊ।।
भक्ति सुतंत्र सकल सुख खानी। बिनु सतसंग न पावहिं प्रानी।।
पुन्य पुंज बिनु मिलहिं न संता। सतसंगति संसृति कर अंता।।
पुन्य एक जग महुँ नहिं दूजा। मन क्रम बचन बिप्र पद पूजा।।
सानुकूल तेहि पर मुनि देवा। जो तजि कपटु करइ द्विज सेवा।।
चौपाई
कहहु भगति पथ कवन प्रयासा। जोग न मख जप तप उपवासा।।
सरल सुभाव न मन कुटिलाई। जथा लाभ संतोष सदाई।।
मोर दास कहाइ नर आसा। करइ तौ कहहु कहा बिस्वासा।।
बहुत कहउँ का कथा बढ़ाई। एहि आचरन बस्य मैं भाई।।
बैर न बिग्रह आस न त्रासा। सुखमय ताहि सदा सब आसा।।
अनारंभ अनिकेत अमानी। अनघ अरोष दच्छ बिग्यानी।।
प्रीति सदा सज्जन संसर्गा। तृन सम बिषय स्वर्ग अपबर्गा।।
भगति पच्छ हठ नहिं सठताई। दुष्ट तर्क सब दूरि बहाई।।
चौपाई
jauṃ paralōka ihāom sukha cahahū. suni mama bacana hrṛdayaom dṛḍha gahahū..
sulabha sukhada māraga yaha bhāī. bhagati mōri purāna śruti gāī..
gyāna agama pratyūha anēkā. sādhana kaṭhina na mana kahuom ṭēkā..
karata kaṣṭa bahu pāvai kōū. bhakti hīna mōhi priya nahiṃ sōū..
bhakti sutaṃtra sakala sukha khānī. binu satasaṃga na pāvahiṃ prānī..
punya puṃja binu milahiṃ na saṃtā. satasaṃgati saṃsṛti kara aṃtā..
punya ēka jaga mahuom nahiṃ dūjā. mana krama bacana bipra pada pūjā..
sānukūla tēhi para muni dēvā. jō taji kapaṭu karai dvija sēvā..
चौपाई
kahahu bhagati patha kavana prayāsā. jōga na makha japa tapa upavāsā..
sarala subhāva na mana kuṭilāī. jathā lābha saṃtōṣa sadāī..
mōra dāsa kahāi nara āsā. karai tau kahahu kahā bisvāsā..
bahuta kahauom kā kathā baḍhaāī. ēhi ācarana basya maiṃ bhāī..
baira na bigraha āsa na trāsā. sukhamaya tāhi sadā saba āsā..
anāraṃbha anikēta amānī. anagha arōṣa daccha bigyānī..
prīti sadā sajjana saṃsargā. tṛna sama biṣaya svarga apabargā..
bhagati paccha haṭha nahiṃ saṭhatāī. duṣṭa tarka saba dūri bahāī..
