चौपाई
सेवहिं सानकूल सब भाई। राम चरन रति अति अधिकाई।।
प्रभु मुख कमल बिलोकत रहहीं। कबहुँ कृपाल हमहि कछु कहहीं।।
राम करहिं भ्रातन्ह पर प्रीती। नाना भाँति सिखावहिं नीती।।
हरषित रहहिं नगर के लोगा। करहिं सकल सुर दुर्लभ भोगा।।
अहनिसि बिधिहि मनावत रहहीं। श्रीरघुबीर चरन रति चहहीं।।
दुइ सुत सुन्दर सीताँ जाए। लव कुस बेद पुरानन्ह गाए।।
दोउ बिजई बिनई गुन मंदिर। हरि प्रतिबिंब मनहुँ अति सुंदर।।
दुइ दुइ सुत सब भ्रातन्ह केरे। भए रूप गुन सील घनेरे।।
चौपाई
प्रातकाल सरऊ करि मज्जन। बैठहिं सभाँ संग द्विज सज्जन।।
बेद पुरान बसिष्ट बखानहिं। सुनहिं राम जद्यपि सब जानहिं।।
अनुजन्ह संजुत भोजन करहीं। देखि सकल जननीं सुख भरहीं।।
भरत सत्रुहन दोनउ भाई। सहित पवनसुत उपबन जाई।।
बूझहिं बैठि राम गुन गाहा। कह हनुमान सुमति अवगाहा।।
सुनत बिमल गुन अति सुख पावहिं। बहुरि बहुरि करि बिनय कहावहिं।।
सब कें गृह गृह होहिं पुराना। रामचरित पावन बिधि नाना।।
नर अरु नारि राम गुन गानहिं। करहिं दिवस निसि जात न जानहिं।।
चौपाई
sēvahiṃ sānakūla saba bhāī. rāma carana rati ati adhikāī..
prabhu mukha kamala bilōkata rahahīṃ. kabahuom kṛpāla hamahi kachu kahahīṃ..
rāma karahiṃ bhrātanha para prītī. nānā bhāomti sikhāvahiṃ nītī..
haraṣita rahahiṃ nagara kē lōgā. karahiṃ sakala sura durlabha bhōgā..
ahanisi bidhihi manāvata rahahīṃ. śrīraghubīra carana rati cahahīṃ..
dui suta sundara sītāom jāē. lava kusa bēda purānanha gāē..
dōu bijaī binaī guna maṃdira. hari pratibiṃba manahuom ati suṃdara..
dui dui suta saba bhrātanha kērē. bhaē rūpa guna sīla ghanērē..
चौपाई
prātakāla saraū kari majjana. baiṭhahiṃ sabhāom saṃga dvija sajjana..
bēda purāna basiṣṭa bakhānahiṃ. sunahiṃ rāma jadyapi saba jānahiṃ..
anujanha saṃjuta bhōjana karahīṃ. dēkhi sakala jananīṃ sukha bharahīṃ..
bharata satruhana dōnau bhāī. sahita pavanasuta upabana jāī..
būjhahiṃ baiṭhi rāma guna gāhā. kaha hanumāna sumati avagāhā..
sunata bimala guna ati sukha pāvahiṃ. bahuri bahuri kari binaya kahāvahiṃ..
saba kēṃ gṛha gṛha hōhiṃ purānā. rāmacarita pāvana bidhi nānā..
nara aru nāri rāma guna gānahiṃ. karahiṃ divasa nisi jāta na jānahiṃ..
