चौपाई
सुनि सुत बध लंकेस रिसाना। पठएसि मेघनाद बलवाना।।
मारसि जनि सुत बांधेसु ताही। देखिअ कपिहि कहाँ कर आही।।
चला इंद्रजित अतुलित जोधा। बंधु निधन सुनि उपजा क्रोधा।।
कपि देखा दारुन भट आवा। कटकटाइ गर्जा अरु धावा।।
अति बिसाल तरु एक उपारा। बिरथ कीन्ह लंकेस कुमारा।।
रहे महाभट ताके संगा। गहि गहि कपि मर्दइ निज अंगा।।
तिन्हहि निपाति ताहि सन बाजा। भिरे जुगल मानहुँ गजराजा।
मुठिका मारि चढ़ा तरु जाई। ताहि एक छन मुरुछा आई।।
उठि बहोरि कीन्हिसि बहु माया। जीति न जाइ प्रभंजन जाया।।
दोहा/सोरठा
ब्रह्म अस्त्र तेहिं साँधा कपि मन कीन्ह बिचार।
जौं न ब्रह्मसर मानउँ महिमा मिटइ अपार।।19।।
चौपाई
ब्रह्मबान कपि कहुँ तेहि मारा। परतिहुँ बार कटकु संघारा।।
तेहि देखा कपि मुरुछित भयऊ। नागपास बाँधेसि लै गयऊ।।
जासु नाम जपि सुनहु भवानी। भव बंधन काटहिं नर ग्यानी।।
तासु दूत कि बंध तरु आवा। प्रभु कारज लगि कपिहिं बँधावा।।
कपि बंधन सुनि निसिचर धाए। कौतुक लागि सभाँ सब आए।।
दसमुख सभा दीखि कपि जाई। कहि न जाइ कछु अति प्रभुताई।।
कर जोरें सुर दिसिप बिनीता। भृकुटि बिलोकत सकल सभीता।।
देखि प्रताप न कपि मन संका। जिमि अहिगन महुँ गरुड़ असंका।।
दोहा/सोरठा
कपिहि बिलोकि दसानन बिहसा कहि दुर्बाद।
सुत बध सुरति कीन्हि पुनि उपजा हृदयँ बिषाद।।20।।
चौपाई
suni suta badha laṃkēsa risānā. paṭhaēsi mēghanāda balavānā..
mārasi jani suta bāṃdhēsu tāhī. dēkhia kapihi kahāom kara āhī..
calā iṃdrajita atulita jōdhā. baṃdhu nidhana suni upajā krōdhā..
kapi dēkhā dāruna bhaṭa āvā. kaṭakaṭāi garjā aru dhāvā..
ati bisāla taru ēka upārā. biratha kīnha laṃkēsa kumārā..
rahē mahābhaṭa tākē saṃgā. gahi gahi kapi mardai nija aṃgā..
tinhahi nipāti tāhi sana bājā. bhirē jugala mānahuom gajarājā.
muṭhikā māri caḍhaā taru jāī. tāhi ēka chana muruchā āī..
uṭhi bahōri kīnhisi bahu māyā. jīti na jāi prabhaṃjana jāyā..
चौपाई
brahmabāna kapi kahuom tēhi mārā. paratihuom bāra kaṭaku saṃghārā..
tēhi dēkhā kapi muruchita bhayaū. nāgapāsa bāomdhēsi lai gayaū..
jāsu nāma japi sunahu bhavānī. bhava baṃdhana kāṭahiṃ nara gyānī..
tāsu dūta ki baṃdha taru āvā. prabhu kāraja lagi kapihiṃ baomdhāvā..
kapi baṃdhana suni nisicara dhāē. kautuka lāgi sabhāom saba āē..
dasamukha sabhā dīkhi kapi jāī. kahi na jāi kachu ati prabhutāī..
kara jōrēṃ sura disipa binītā. bhṛkuṭi bilōkata sakala sabhītā..
dēkhi pratāpa na kapi mana saṃkā. jimi ahigana mahuom garuḍa asaṃkā..
