चौपाई
प्रभु के बचन सीस धरि सीता। बोली मन क्रम बचन पुनीता।।
लछिमन होहु धरम के नेगी। पावक प्रगट करहु तुम्ह बेगी।।
सुनि लछिमन सीता कै बानी। बिरह बिबेक धरम निति सानी।।
लोचन सजल जोरि कर दोऊ। प्रभु सन कछु कहि सकत न ओऊ।।
देखि राम रुख लछिमन धाए। पावक प्रगटि काठ बहु लाए।।
पावक प्रबल देखि बैदेही। हृदयँ हरष नहिं भय कछु तेही।।
जौं मन बच क्रम मम उर माहीं। तजि रघुबीर आन गति नाहीं।।
तौ कृसानु सब कै गति जाना। मो कहुँ होउ श्रीखंड समाना।।
चौपाई
तब रघुपति अनुसासन पाई। मातलि चलेउ चरन सिरु नाई।।
आए देव सदा स्वारथी। बचन कहहिं जनु परमारथी।।
दीन बंधु दयाल रघुराया। देव कीन्हि देवन्ह पर दाया।।
बिस्व द्रोह रत यह खल कामी। निज अघ गयउ कुमारगगामी।।
तुम्ह समरूप ब्रह्म अबिनासी। सदा एकरस सहज उदासी।।
अकल अगुन अज अनघ अनामय। अजित अमोघसक्ति करुनामय।।
मीन कमठ सूकर नरहरी। बामन परसुराम बपु धरी।।
जब जब नाथ सुरन्ह दुखु पायो। नाना तनु धरि तुम्हइँ नसायो।।
यह खल मलिन सदा सुरद्रोही। काम लोभ मद रत अति कोही।।
अधम सिरोमनि तव पद पावा। यह हमरे मन बिसमय आवा।।
हम देवता परम अधिकारी। स्वारथ रत प्रभु भगति बिसारी।।
भव प्रबाहँ संतत हम परे। अब प्रभु पाहि सरन अनुसरे।।
चौपाई
prabhu kē bacana sīsa dhari sītā. bōlī mana krama bacana punītā..
lachimana hōhu dharama kē nēgī. pāvaka pragaṭa karahu tumha bēgī..
suni lachimana sītā kai bānī. biraha bibēka dharama niti sānī..
lōcana sajala jōri kara dōū. prabhu sana kachu kahi sakata na ōū..
dēkhi rāma rukha lachimana dhāē. pāvaka pragaṭi kāṭha bahu lāē..
pāvaka prabala dēkhi baidēhī. hṛdayaom haraṣa nahiṃ bhaya kachu tēhī..
jauṃ mana baca krama mama ura māhīṃ. taji raghubīra āna gati nāhīṃ..
tau kṛsānu saba kai gati jānā. mō kahuom hōu śrīkhaṃḍa samānā..
चौपाई
taba raghupati anusāsana pāī. mātali calēu carana siru nāī..
āē dēva sadā svārathī. bacana kahahiṃ janu paramārathī..
dīna baṃdhu dayāla raghurāyā. dēva kīnhi dēvanha para dāyā..
bisva drōha rata yaha khala kāmī. nija agha gayau kumāragagāmī..
tumha samarūpa brahma abināsī. sadā ēkarasa sahaja udāsī..
akala aguna aja anagha anāmaya. ajita amōghasakti karunāmaya..
mīna kamaṭha sūkara naraharī. bāmana parasurāma bapu dharī..
jaba jaba nātha suranha dukhu pāyō. nānā tanu dhari tumhaiom nasāyō..
yaha khala malina sadā suradrōhī. kāma lōbha mada rata ati kōhī..
adhama sirōmani tava pada pāvā. yaha hamarē mana bisamaya āvā..
hama dēvatā parama adhikārī. svāratha rata prabhu bhagati bisārī..
bhava prabāhaom saṃtata hama parē. aba prabhu pāhi sarana anusarē..
