चौपाई
मंदोदरी बचन सुनि काना। सुर मुनि सिद्ध सबन्हि सुख माना।।
अज महेस नारद सनकादी। जे मुनिबर परमारथबादी।।
भरि लोचन रघुपतिहि निहारी। प्रेम मगन सब भए सुखारी।।
रुदन करत देखीं सब नारी। गयउ बिभीषनु मन दुख भारी।।
बंधु दसा बिलोकि दुख कीन्हा। तब प्रभु अनुजहि आयसु दीन्हा।।
लछिमन तेहि बहु बिधि समुझायो। बहुरि बिभीषन प्रभु पहिं आयो।।
कृपादृष्टि प्रभु ताहि बिलोका। करहु क्रिया परिहरि सब सोका।।
कीन्हि क्रिया प्रभु आयसु मानी। बिधिवत देस काल जियँ जानी।।
चौपाई
आइ बिभीषन पुनि सिरु नायो। कृपासिंधु तब अनुज बोलायो।।
तुम्ह कपीस अंगद नल नीला। जामवंत मारुति नयसीला।।
सब मिलि जाहु बिभीषन साथा। सारेहु तिलक कहेउ रघुनाथा।।
पिता बचन मैं नगर न आवउँ। आपु सरिस कपि अनुज पठावउँ।।
तुरत चले कपि सुनि प्रभु बचना। कीन्ही जाइ तिलक की रचना।।
सादर सिंहासन बैठारी। तिलक सारि अस्तुति अनुसारी।।
जोरि पानि सबहीं सिर नाए। सहित बिभीषन प्रभु पहिं आए।।
तब रघुबीर बोलि कपि लीन्हे। कहि प्रिय बचन सुखी सब कीन्हे।।
चौपाई
maṃdōdarī bacana suni kānā. sura muni siddha sabanhi sukha mānā..
aja mahēsa nārada sanakādī. jē munibara paramārathabādī..
bhari lōcana raghupatihi nihārī. prēma magana saba bhaē sukhārī..
rudana karata dēkhīṃ saba nārī. gayau bibhīṣanu mana dukha bhārī..
baṃdhu dasā bilōki dukha kīnhā. taba prabhu anujahi āyasu dīnhā..
lachimana tēhi bahu bidhi samujhāyō. bahuri bibhīṣana prabhu pahiṃ āyō..
kṛpādṛṣṭi prabhu tāhi bilōkā. karahu kriyā parihari saba sōkā..
kīnhi kriyā prabhu āyasu mānī. bidhivata dēsa kāla jiyaom jānī..
चौपाई
āi bibhīṣana puni siru nāyō. kṛpāsiṃdhu taba anuja bōlāyō..
tumha kapīsa aṃgada nala nīlā. jāmavaṃta māruti nayasīlā..
saba mili jāhu bibhīṣana sāthā. sārēhu tilaka kahēu raghunāthā..
pitā bacana maiṃ nagara na āvauom. āpu sarisa kapi anuja paṭhāvauom..
turata calē kapi suni prabhu bacanā. kīnhī jāi tilaka kī racanā..
sādara siṃhāsana baiṭhārī. tilaka sāri astuti anusārī..
jōri pāni sabahīṃ sira nāē. sahita bibhīṣana prabhu pahiṃ āē..
taba raghubīra bōli kapi līnhē. kahi priya bacana sukhī saba kīnhē..
