छंद
जब कीन्ह तेहिं पाषंड। भए प्रगट जंतु प्रचंड।।
बेताल भूत पिसाच। कर धरें धनु नाराच।।1।।
जोगिनि गहें करबाल। एक हाथ मनुज कपाल।।
करि सद्य सोनित पान। नाचहिं करहिं बहु गान।।2।।
धरु मारु बोलहिं घोर। रहि पूरि धुनि चहुँ ओर।।
मुख बाइ धावहिं खान। तब लगे कीस परान।।3।।
जहँ जाहिं मर्कट भागि। तहँ बरत देखहिं आगि।।
भए बिकल बानर भालु। पुनि लाग बरषै बालु।।4।।
जहँ तहँ थकित करि कीस। गर्जेउ बहुरि दससीस।।
लछिमन कपीस समेत। भए सकल बीर अचेत।।5।।
हा राम हा रघुनाथ। कहि सुभट मीजहिं हाथ।।
एहि बिधि सकल बल तोरि। तेहिं कीन्ह कपट बहोरि।।6।।
प्रगटेसि बिपुल हनुमान। धाए गहे पाषान।।
तिन्ह रामु घेरे जाइ। चहुँ दिसि बरूथ बनाइ।।7।।
मारहु धरहु जनि जाइ। कटकटहिं पूँछ उठाइ।।
दहँ दिसि लँगूर बिराज। तेहिं मध्य कोसलराज।।8।।
तेहिं मध्य कोसलराज सुंदर स्याम तन सोभा लही।
जनु इंद्रधनुष अनेक की बर बारि तुंग तमालही।।
प्रभु देखि हरष बिषाद उर सुर बदत जय जय जय करी।
रघुबीर एकहि तीर कोपि निमेष महुँ माया हरी।।1।।
माया बिगत कपि भालु हरषे बिटप गिरि गहि सब फिरे।
सर निकर छाड़े राम रावन बाहु सिर पुनि महि गिरे।।
श्रीराम रावन समर चरित अनेक कल्प जो गावहीं।
सत सेष सारद निगम कबि तेउ तदपि पार न पावहीं।।2।।
चौपाई
काटत बढ़हिं सीस समुदाई। जिमि प्रति लाभ लोभ अधिकाई।।
मरइ न रिपु श्रम भयउ बिसेषा। राम बिभीषन तन तब देखा।।
उमा काल मर जाकीं ईछा। सो प्रभु जन कर प्रीति परीछा।।
सुनु सरबग्य चराचर नायक। प्रनतपाल सुर मुनि सुखदायक।।
नाभिकुंड पियूष बस याकें। नाथ जिअत रावनु बल ताकें।।
सुनत बिभीषन बचन कृपाला। हरषि गहे कर बान कराला।।
असुभ होन लागे तब नाना। रोवहिं खर सृकाल बहु स्वाना।।
बोलहि खग जग आरति हेतू। प्रगट भए नभ जहँ तहँ केतू।।
दस दिसि दाह होन अति लागा। भयउ परब बिनु रबि उपरागा।।
मंदोदरि उर कंपति भारी। प्रतिमा स्त्रवहिं नयन मग बारी।।
छंद
jaba kīnha tēhiṃ pāṣaṃḍa. bhaē pragaṭa jaṃtu pracaṃḍa..
bētāla bhūta pisāca. kara dharēṃ dhanu nārāca..1..
jōgini gahēṃ karabāla. ēka hātha manuja kapāla..
kari sadya sōnita pāna. nācahiṃ karahiṃ bahu gāna..2..
dharu māru bōlahiṃ ghōra. rahi pūri dhuni cahuom ōra..
mukha bāi dhāvahiṃ khāna. taba lagē kīsa parāna..3..
jahaom jāhiṃ markaṭa bhāgi. tahaom barata dēkhahiṃ āgi..
bhaē bikala bānara bhālu. puni lāga baraṣai bālu..4..
jahaom tahaom thakita kari kīsa. garjēu bahuri dasasīsa..
lachimana kapīsa samēta. bhaē sakala bīra acēta..5..
hā rāma hā raghunātha. kahi subhaṭa mījahiṃ hātha..
ēhi bidhi sakala bala tōri. tēhiṃ kīnha kapaṭa bahōri..6..
pragaṭēsi bipula hanumāna. dhāē gahē pāṣāna..
tinha rāmu ghērē jāi. cahuom disi barūtha banāi..7..
mārahu dharahu jani jāi. kaṭakaṭahiṃ pūomcha uṭhāi..
dahaom disi laomgūra birāja. tēhiṃ madhya kōsalarāja..8..
tēhiṃ madhya kōsalarāja suṃdara syāma tana sōbhā lahī.
janu iṃdradhanuṣa anēka kī bara bāri tuṃga tamālahī..
prabhu dēkhi haraṣa biṣāda ura sura badata jaya jaya jaya karī.
raghubīra ēkahi tīra kōpi nimēṣa mahuom māyā harī..1..
māyā bigata kapi bhālu haraṣē biṭapa giri gahi saba phirē.
sara nikara chāḍaē rāma rāvana bāhu sira puni mahi girē..
śrīrāma rāvana samara carita anēka kalpa jō gāvahīṃ.
sata sēṣa sārada nigama kabi tēu tadapi pāra na pāvahīṃ..2..
चौपाई
kāṭata baḍhahiṃ sīsa samudāī. jimi prati lābha lōbha adhikāī..
marai na ripu śrama bhayau bisēṣā. rāma bibhīṣana tana taba dēkhā..
umā kāla mara jākīṃ īchā. sō prabhu jana kara prīti parīchā..
sunu sarabagya carācara nāyaka. pranatapāla sura muni sukhadāyaka..
nābhikuṃḍa piyūṣa basa yākēṃ. nātha jiata rāvanu bala tākēṃ..
sunata bibhīṣana bacana kṛpālā. haraṣi gahē kara bāna karālā..
asubha hōna lāgē taba nānā. rōvahiṃ khara sṛkāla bahu svānā..
bōlahi khaga jaga ārati hētū. pragaṭa bhaē nabha jahaom tahaom kētū..
dasa disi dāha hōna ati lāgā. bhayau paraba binu rabi uparāgā..
maṃdōdari ura kaṃpati bhārī. pratimā stravahiṃ nayana maga bārī..
