चौपाई
बैठे सुर सब करहिं बिचारा। कहँ पाइअ प्रभु करिअ पुकारा।।
पुर बैकुंठ जान कह कोई। कोउ कह पयनिधि बस प्रभु सोई।।
जाके हृदयँ भगति जसि प्रीति। प्रभु तहँ प्रगट सदा तेहिं रीती।।
तेहि समाज गिरिजा मैं रहेऊँ। अवसर पाइ बचन एक कहेऊँ।।
हरि ब्यापक सर्बत्र समाना। प्रेम तें प्रगट होहिं मैं जाना।।
देस काल दिसि बिदिसिहु माहीं। कहहु सो कहाँ जहाँ प्रभु नाहीं।।
अग जगमय सब रहित बिरागी। प्रेम तें प्रभु प्रगटइ जिमि आगी।।
मोर बचन सब के मन माना। साधु साधु करि ब्रह्म बखाना।।
दोहा/सोरठा
सुनि बिरंचि मन हरष तन पुलकि नयन बह नीर।
अस्तुति करत जोरि कर सावधान मतिधीर।।185।।
छंद
जय जय सुरनायक जन सुखदायक प्रनतपाल भगवंता।
गो द्विज हितकारी जय असुरारी सिधुंसुता प्रिय कंता।।
पालन सुर धरनी अद्भुत करनी मरम न जानइ कोई।
जो सहज कृपाला दीनदयाला करउ अनुग्रह सोई।।
जय जय अबिनासी सब घट बासी ब्यापक परमानंदा।
अबिगत गोतीतं चरित पुनीतं मायारहित मुकुंदा।।
जेहि लागि बिरागी अति अनुरागी बिगतमोह मुनिबृंदा।
निसि बासर ध्यावहिं गुन गन गावहिं जयति सच्चिदानंदा।।
जेहिं सृष्टि उपाई त्रिबिध बनाई संग सहाय न दूजा।
सो करउ अघारी चिंत हमारी जानिअ भगति न पूजा।।
जो भव भय भंजन मुनि मन रंजन गंजन बिपति बरूथा।
मन बच क्रम बानी छाड़ि सयानी सरन सकल सुर जूथा।।
सारद श्रुति सेषा रिषय असेषा जा कहुँ कोउ नहि जाना।
जेहि दीन पिआरे बेद पुकारे द्रवउ सो श्रीभगवाना।।
भव बारिधि मंदर सब बिधि सुंदर गुनमंदिर सुखपुंजा।
मुनि सिद्ध सकल सुर परम भयातुर नमत नाथ पद कंजा।।
चौपाई
baiṭhē sura saba karahiṃ bicārā. kahaom pāia prabhu karia pukārā..
pura baikuṃṭha jāna kaha kōī. kōu kaha payanidhi basa prabhu sōī..
jākē hṛdayaom bhagati jasi prīti. prabhu tahaom pragaṭa sadā tēhiṃ rītī..
tēhi samāja girijā maiṃ rahēūom. avasara pāi bacana ēka kahēūom..
hari byāpaka sarbatra samānā. prēma tēṃ pragaṭa hōhiṃ maiṃ jānā..
dēsa kāla disi bidisihu māhīṃ. kahahu sō kahāom jahāom prabhu nāhīṃ..
aga jagamaya saba rahita birāgī. prēma tēṃ prabhu pragaṭai jimi āgī..
mōra bacana saba kē mana mānā. sādhu sādhu kari brahma bakhānā..
छंद
jaya jaya suranāyaka jana sukhadāyaka pranatapāla bhagavaṃtā.
gō dvija hitakārī jaya asurārī sidhuṃsutā priya kaṃtā..
pālana sura dharanī adbhuta karanī marama na jānai kōī.
jō sahaja kṛpālā dīnadayālā karau anugraha sōī..
jaya jaya abināsī saba ghaṭa bāsī byāpaka paramānaṃdā.
abigata gōtītaṃ carita punītaṃ māyārahita mukuṃdā..
jēhi lāgi birāgī ati anurāgī bigatamōha munibṛṃdā.
nisi bāsara dhyāvahiṃ guna gana gāvahiṃ jayati saccidānaṃdā..
jēhiṃ sṛṣṭi upāī tribidha banāī saṃga sahāya na dūjā.
sō karau aghārī ciṃta hamārī jānia bhagati na pūjā..
jō bhava bhaya bhaṃjana muni mana raṃjana gaṃjana bipati barūthā.
mana baca krama bānī chāḍai sayānī sarana sakala sura jūthā..
sārada śruti sēṣā riṣaya asēṣā jā kahuom kōu nahi jānā.
jēhi dīna piārē bēda pukārē dravau sō śrībhagavānā..
bhava bāridhi maṃdara saba bidhi suṃdara gunamaṃdira sukhapuṃjā.
muni siddha sakala sura parama bhayātura namata nātha pada kaṃjā..
