चौपाई
कीन्हि प्रस्न जेहि भाँति भवानी। जेहि बिधि संकर कहा बखानी।।
सो सब हेतु कहब मैं गाई। कथाप्रबंध बिचित्र बनाई।।
जेहि यह कथा सुनी नहिं होई। जनि आचरजु करैं सुनि सोई।।
कथा अलौकिक सुनहिं जे ग्यानी। नहिं आचरजु करहिं अस जानी।।
रामकथा कै मिति जग नाहीं। असि प्रतीति तिन्ह के मन माहीं।।
नाना भाँति राम अवतारा। रामायन सत कोटि अपारा।।
कलपभेद हरिचरित सुहाए। भाँति अनेक मुनीसन्ह गाए।।
करिअ न संसय अस उर आनी। सुनिअ कथा सारद रति मानी।।
दोहा/सोरठा
राम अनंत अनंत गुन अमित कथा बिस्तार।
सुनि आचरजु न मानिहहिं जिन्ह कें बिमल बिचार।।33।।
चौपाई
एहि बिधि सब संसय करि दूरी। सिर धरि गुर पद पंकज धूरी।।
पुनि सबही बिनवउँ कर जोरी। करत कथा जेहिं लाग न खोरी।।
सादर सिवहि नाइ अब माथा। बरनउँ बिसद राम गुन गाथा।।
संबत सोरह सै एकतीसा। करउँ कथा हरि पद धरि सीसा।।
नौमी भौम बार मधु मासा। अवधपुरीं यह चरित प्रकासा।।
जेहि दिन राम जनम श्रुति गावहिं। तीरथ सकल तहाँ चलि आवहिं।।
असुर नाग खग नर मुनि देवा। आइ करहिं रघुनायक सेवा।।
जन्म महोत्सव रचहिं सुजाना। करहिं राम कल कीरति गाना।।
दोहा/सोरठा
मज्जहि सज्जन बृंद बहु पावन सरजू नीर।
जपहिं राम धरि ध्यान उर सुंदर स्याम सरीर।।34।।
चौपाई
kīnhi prasna jēhi bhāomti bhavānī. jēhi bidhi saṃkara kahā bakhānī..
sō saba hētu kahaba maiṃ gāī. kathāprabaṃdha bicitra banāī..
jēhi yaha kathā sunī nahiṃ hōī. jani ācaraju karaiṃ suni sōī..
kathā alaukika sunahiṃ jē gyānī. nahiṃ ācaraju karahiṃ asa jānī..
rāmakathā kai miti jaga nāhīṃ. asi pratīti tinha kē mana māhīṃ..
nānā bhāomti rāma avatārā. rāmāyana sata kōṭi apārā..
kalapabhēda haricarita suhāē. bhāomti anēka munīsanha gāē..
karia na saṃsaya asa ura ānī. sunia kathā sārada rati mānī..
चौपाई
ēhi bidhi saba saṃsaya kari dūrī. sira dhari gura pada paṃkaja dhūrī..
puni sabahī binavauom kara jōrī. karata kathā jēhiṃ lāga na khōrī..
sādara sivahi nāi aba māthā. baranauom bisada rāma guna gāthā..
saṃbata sōraha sai ēkatīsā. karauom kathā hari pada dhari sīsā..
naumī bhauma bāra madhu māsā. avadhapurīṃ yaha carita prakāsā..
jēhi dina rāma janama śruti gāvahiṃ. tīratha sakala tahāom cali āvahiṃ..
asura nāga khaga nara muni dēvā. āi karahiṃ raghunāyaka sēvā..
janma mahōtsava racahiṃ sujānā. karahiṃ rāma kala kīrati gānā..
