चौपाई
मुनि कहुँ राम दंडवत कीन्हा। आसिरबादु बिप्रबर दीन्हा।।
देखि राम छबि नयन जुड़ाने। करि सनमानु आश्रमहिं आने।।
मुनिबर अतिथि प्रानप्रिय पाए। कंद मूल फल मधुर मगाए।।
सिय सौमित्रि राम फल खाए। तब मुनि आश्रम दिए सुहाए।।
बालमीकि मन आनँदु भारी। मंगल मूरति नयन निहारी।।
तब कर कमल जोरि रघुराई। बोले बचन श्रवन सुखदाई।।
तुम्ह त्रिकाल दरसी मुनिनाथा। बिस्व बदर जिमि तुम्हरें हाथा।।
अस कहि प्रभु सब कथा बखानी। जेहि जेहि भाँति दीन्ह बनु रानी।।
दोहा/सोरठा
तात बचन पुनि मातु हित भाइ भरत अस राउ।
मो कहुँ दरस तुम्हार प्रभु सबु मम पुन्य प्रभाउ।।125।।
चौपाई
देखि पाय मुनिराय तुम्हारे। भए सुकृत सब सुफल हमारे।।
अब जहँ राउर आयसु होई। मुनि उदबेगु न पावै कोई।।
मुनि तापस जिन्ह तें दुखु लहहीं। ते नरेस बिनु पावक दहहीं।।
मंगल मूल बिप्र परितोषू। दहइ कोटि कुल भूसुर रोषू।।
अस जियँ जानि कहिअ सोइ ठाऊँ। सिय सौमित्रि सहित जहँ जाऊँ।।
तहँ रचि रुचिर परन तृन साला। बासु करौ कछु काल कृपाला।।
सहज सरल सुनि रघुबर बानी। साधु साधु बोले मुनि ग्यानी।।
कस न कहहु अस रघुकुलकेतू। तुम्ह पालक संतत श्रुति सेतू।।
चौपाई
muni kahuom rāma daṃḍavata kīnhā. āsirabādu biprabara dīnhā..
dēkhi rāma chabi nayana juḍaānē. kari sanamānu āśramahiṃ ānē..
munibara atithi prānapriya pāē. kaṃda mūla phala madhura magāē..
siya saumitri rāma phala khāē. taba muni āśrama diē suhāē..
bālamīki mana ānaomdu bhārī. maṃgala mūrati nayana nihārī..
taba kara kamala jōri raghurāī. bōlē bacana śravana sukhadāī..
tumha trikāla darasī munināthā. bisva badara jimi tumharēṃ hāthā..
asa kahi prabhu saba kathā bakhānī. jēhi jēhi bhāomti dīnha banu rānī..
चौपाई
dēkhi pāya munirāya tumhārē. bhaē sukṛta saba suphala hamārē..
aba jahaom rāura āyasu hōī. muni udabēgu na pāvai kōī..
muni tāpasa jinha tēṃ dukhu lahahīṃ. tē narēsa binu pāvaka dahahīṃ..
maṃgala mūla bipra paritōṣū. dahai kōṭi kula bhūsura rōṣū..
asa jiyaom jāni kahia sōi ṭhāūom. siya saumitri sahita jahaom jāūom..
tahaom raci rucira parana tṛna sālā. bāsu karau kachu kāla kṛpālā..
sahaja sarala suni raghubara bānī. sādhu sādhu bōlē muni gyānī..
kasa na kahahu asa raghukulakētū. tumha pālaka saṃtata śruti sētū..
