चौपाई
नर अहार रजनीचर चरहीं। कपट बेष बिधि कोटिक करहीं।।
लागइ अति पहार कर पानी। बिपिन बिपति नहिं जाइ बखानी।।
ब्याल कराल बिहग बन घोरा। निसिचर निकर नारि नर चोरा।।
डरपहिं धीर गहन सुधि आएँ। मृगलोचनि तुम्ह भीरु सुभाएँ।।
हंसगवनि तुम्ह नहिं बन जोगू। सुनि अपजसु मोहि देइहि लोगू।।
मानस सलिल सुधाँ प्रतिपाली। जिअइ कि लवन पयोधि मराली।।
नव रसाल बन बिहरनसीला। सोह कि कोकिल बिपिन करीला।।
रहहु भवन अस हृदयँ बिचारी। चंदबदनि दुखु कानन भारी।।
दोहा/सोरठा
सहज सुह्द गुर स्वामि सिख जो न करइ सिर मानि।।
सो पछिताइ अघाइ उर अवसि होइ हित हानि।।63।।
चौपाई
सुनि मृदु बचन मनोहर पिय के। लोचन ललित भरे जल सिय के।।
सीतल सिख दाहक भइ कैंसें। चकइहि सरद चंद निसि जैंसें।।
उतरु न आव बिकल बैदेही। तजन चहत सुचि स्वामि सनेही।।
बरबस रोकि बिलोचन बारी। धरि धीरजु उर अवनिकुमारी।।
लागि सासु पग कह कर जोरी। छमबि देबि बड़ि अबिनय मोरी।।
दीन्हि प्रानपति मोहि सिख सोई। जेहि बिधि मोर परम हित होई।।
मैं पुनि समुझि दीखि मन माहीं। पिय बियोग सम दुखु जग नाहीं।।
दोहा/सोरठा
प्राननाथ करुनायतन सुंदर सुखद सुजान।
तुम्ह बिनु रघुकुल कुमुद बिधु सुरपुर नरक समान।।64।।
चौपाई
nara ahāra rajanīcara carahīṃ. kapaṭa bēṣa bidhi kōṭika karahīṃ..
lāgai ati pahāra kara pānī. bipina bipati nahiṃ jāi bakhānī..
byāla karāla bihaga bana ghōrā. nisicara nikara nāri nara cōrā..
ḍarapahiṃ dhīra gahana sudhi āēom. mṛgalōcani tumha bhīru subhāēom..
haṃsagavani tumha nahiṃ bana jōgū. suni apajasu mōhi dēihi lōgū..
mānasa salila sudhāom pratipālī. jiai ki lavana payōdhi marālī..
nava rasāla bana biharanasīlā. sōha ki kōkila bipina karīlā..
rahahu bhavana asa hṛdayaom bicārī. caṃdabadani dukhu kānana bhārī..
चौपाई
suni mṛdu bacana manōhara piya kē. lōcana lalita bharē jala siya kē..
sītala sikha dāhaka bhai kaiṃsēṃ. cakaihi sarada caṃda nisi jaiṃsēṃ..
utaru na āva bikala baidēhī. tajana cahata suci svāmi sanēhī..
barabasa rōki bilōcana bārī. dhari dhīraju ura avanikumārī..
lāgi sāsu paga kaha kara jōrī. chamabi dēbi baḍai abinaya mōrī..
dīnhi prānapati mōhi sikha sōī. jēhi bidhi mōra parama hita hōī..
maiṃ puni samujhi dīkhi mana māhīṃ. piya biyōga sama dukhu jaga nāhīṃ..
