चौपाई
सुनि अति बिकल भरत बर बानी। आरति प्रीति बिनय नय सानी।।
सोक मगन सब सभाँ खभारू। मनहुँ कमल बन परेउ तुसारू।।
कहि अनेक बिधि कथा पुरानी। भरत प्रबोधु कीन्ह मुनि ग्यानी।।
बोले उचित बचन रघुनंदू। दिनकर कुल कैरव बन चंदू।।
तात जाँय जियँ करहु गलानी। ईस अधीन जीव गति जानी।।
तीनि काल तिभुअन मत मोरें। पुन्यसिलोक तात तर तोरे।।
उर आनत तुम्ह पर कुटिलाई। जाइ लोकु परलोकु नसाई।।
दोसु देहिं जननिहि जड़ तेई। जिन्ह गुर साधु सभा नहिं सेई।।
दोहा/सोरठा
मिटिहहिं पाप प्रपंच सब अखिल अमंगल भार।
लोक सुजसु परलोक सुखु सुमिरत नामु तुम्हार।।263।।
चौपाई
कहउँ सुभाउ सत्य सिव साखी। भरत भूमि रह राउरि राखी।।
तात कुतरक करहु जनि जाएँ। बैर पेम नहि दुरइ दुराएँ।।
मुनि गन निकट बिहग मृग जाहीं। बाधक बधिक बिलोकि पराहीं।।
हित अनहित पसु पच्छिउ जाना। मानुष तनु गुन ग्यान निधाना।।
तात तुम्हहि मैं जानउँ नीकें। करौं काह असमंजस जीकें।।
राखेउ रायँ सत्य मोहि त्यागी। तनु परिहरेउ पेम पन लागी।।
तासु बचन मेटत मन सोचू। तेहि तें अधिक तुम्हार सँकोचू।।
ता पर गुर मोहि आयसु दीन्हा। अवसि जो कहहु चहउँ सोइ कीन्हा।।
दोहा/सोरठा
मनु प्रसन्न करि सकुच तजि कहहु करौं सोइ आजु।
सत्यसंध रघुबर बचन सुनि भा सुखी समाजु।।264।।
चौपाई
suni ati bikala bharata bara bānī. ārati prīti binaya naya sānī..
sōka magana saba sabhāom khabhārū. manahuom kamala bana parēu tusārū..
kahi anēka bidhi kathā purānī. bharata prabōdhu kīnha muni gyānī..
bōlē ucita bacana raghunaṃdū. dinakara kula kairava bana caṃdū..
tāta jāomya jiyaom karahu galānī. īsa adhīna jīva gati jānī..
tīni kāla tibhuana mata mōrēṃ. punyasilōka tāta tara tōrē..
ura ānata tumha para kuṭilāī. jāi lōku paralōku nasāī..
dōsu dēhiṃ jananihi jaḍa tēī. jinha gura sādhu sabhā nahiṃ sēī..
चौपाई
kahauom subhāu satya siva sākhī. bharata bhūmi raha rāuri rākhī..
tāta kutaraka karahu jani jāēom. baira pēma nahi durai durāēom..
muni gana nikaṭa bihaga mṛga jāhīṃ. bādhaka badhika bilōki parāhīṃ..
hita anahita pasu pacchiu jānā. mānuṣa tanu guna gyāna nidhānā..
tāta tumhahi maiṃ jānauom nīkēṃ. karauṃ kāha asamaṃjasa jīkēṃ..
rākhēu rāyaom satya mōhi tyāgī. tanu pariharēu pēma pana lāgī..
tāsu bacana mēṭata mana sōcū. tēhi tēṃ adhika tumhāra saomkōcū..
tā para gura mōhi āyasu dīnhā. avasi jō kahahu cahauom sōi kīnhā..
