चौपाई
अनुसुइया के पद गहि सीता। मिली बहोरि सुसील बिनीता।।
रिषिपतिनी मन सुख अधिकाई। आसिष देइ निकट बैठाई।।
दिब्य बसन भूषन पहिराए। जे नित नूतन अमल सुहाए।।
कह रिषिबधू सरस मृदु बानी। नारिधर्म कछु ब्याज बखानी।।
मातु पिता भ्राता हितकारी। मितप्रद सब सुनु राजकुमारी।।
अमित दानि भर्ता बयदेही। अधम सो नारि जो सेव न तेही।।
धीरज धर्म मित्र अरु नारी। आपद काल परिखिअहिं चारी।।
बृद्ध रोगबस जड़ धनहीना। अधं बधिर क्रोधी अति दीना।।
ऐसेहु पति कर किएँ अपमाना। नारि पाव जमपुर दुख नाना।।
एकइ धर्म एक ब्रत नेमा। कायँ बचन मन पति पद प्रेमा।।
जग पति ब्रता चारि बिधि अहहिं। बेद पुरान संत सब कहहिं।।
उत्तम के अस बस मन माहीं। सपनेहुँ आन पुरुष जग नाहीं।।
मध्यम परपति देखइ कैसें। भ्राता पिता पुत्र निज जैंसें।।
धर्म बिचारि समुझि कुल रहई। सो निकिष्ट त्रिय श्रुति अस कहई।।
बिनु अवसर भय तें रह जोई। जानेहु अधम नारि जग सोई।।
पति बंचक परपति रति करई। रौरव नरक कल्प सत परई।।
छन सुख लागि जनम सत कोटि। दुख न समुझ तेहि सम को खोटी।।
बिनु श्रम नारि परम गति लहई। पतिब्रत धर्म छाड़ि छल गहई।।
पति प्रतिकुल जनम जहँ जाई। बिधवा होई पाई तरुनाई।।
दोहा/सोरठा
सहज अपावनि नारि पति सेवत सुभ गति लहइ।
जसु गावत श्रुति चारि अजहु तुलसिका हरिहि प्रिय।।5(क)।।
सुनु सीता तव नाम सुमिर नारि पतिब्रत करहि।
तोहि प्रानप्रिय राम कहिउँ कथा संसार हित।।5(ख)।।
चौपाई
सुनि जानकीं परम सुखु पावा। सादर तासु चरन सिरु नावा।।
तब मुनि सन कह कृपानिधाना। आयसु होइ जाउँ बन आना।।
संतत मो पर कृपा करेहू। सेवक जानि तजेहु जनि नेहू।।
धर्म धुरंधर प्रभु कै बानी। सुनि सप्रेम बोले मुनि ग्यानी।।
जासु कृपा अज सिव सनकादी। चहत सकल परमारथ बादी।।
ते तुम्ह राम अकाम पिआरे। दीन बंधु मृदु बचन उचारे।।
अब जानी मैं श्री चतुराई। भजी तुम्हहि सब देव बिहाई।।
जेहि समान अतिसय नहिं कोई। ता कर सील कस न अस होई।।
केहि बिधि कहौं जाहु अब स्वामी। कहहु नाथ तुम्ह अंतरजामी।।
अस कहि प्रभु बिलोकि मुनि धीरा। लोचन जल बह पुलक सरीरा।।
छंद
तन पुलक निर्भर प्रेम पुरन नयन मुख पंकज दिए।
मन ग्यान गुन गोतीत प्रभु मैं दीख जप तप का किए।।
जप जोग धर्म समूह तें नर भगति अनुपम पावई।
रधुबीर चरित पुनीत निसि दिन दास तुलसी गावई।।
दोहा/सोरठा
कलिमल समन दमन मन राम सुजस सुखमूल।
सादर सुनहि जे तिन्ह पर राम रहहिं अनुकूल।।6(क)।।
कठिन काल मल कोस धर्म न ग्यान न जोग जप।
परिहरि सकल भरोस रामहि भजहिं ते चतुर नर।।6(ख)।।
चौपाई
anusuiyā kē pada gahi sītā. milī bahōri susīla binītā..
riṣipatinī mana sukha adhikāī. āsiṣa dēi nikaṭa baiṭhāī..
dibya basana bhūṣana pahirāē. jē nita nūtana amala suhāē..
kaha riṣibadhū sarasa mṛdu bānī. nāridharma kachu byāja bakhānī..
mātu pitā bhrātā hitakārī. mitaprada saba sunu rājakumārī..
amita dāni bhartā bayadēhī. adhama sō nāri jō sēva na tēhī..
dhīraja dharma mitra aru nārī. āpada kāla parikhiahiṃ cārī..
bṛddha rōgabasa jaḍa dhanahīnā. adhaṃ badhira krōdhī ati dīnā..
aisēhu pati kara kiēom apamānā. nāri pāva jamapura dukha nānā..
ēkai dharma ēka brata nēmā. kāyaom bacana mana pati pada prēmā..
jaga pati bratā cāri bidhi ahahiṃ. bēda purāna saṃta saba kahahiṃ..
uttama kē asa basa mana māhīṃ. sapanēhuom āna puruṣa jaga nāhīṃ..
madhyama parapati dēkhai kaisēṃ. bhrātā pitā putra nija jaiṃsēṃ..
dharma bicāri samujhi kula rahaī. sō nikiṣṭa triya śruti asa kahaī..
binu avasara bhaya tēṃ raha jōī. jānēhu adhama nāri jaga sōī..
pati baṃcaka parapati rati karaī. raurava naraka kalpa sata paraī..
chana sukha lāgi janama sata kōṭi. dukha na samujha tēhi sama kō khōṭī..
binu śrama nāri parama gati lahaī. patibrata dharma chāḍai chala gahaī..
pati pratikula janama jahaom jāī. bidhavā hōī pāī tarunāī..
दोहा/सोरठा
sahaja apāvani nāri pati sēvata subha gati lahai.
jasu gāvata śruti cāri ajahu tulasikā harihi priya..5ka..
sanu sītā tava nāma sumira nāri patibrata karahi.
tōhi prānapriya rāma kahiuom kathā saṃsāra hita..5kha..
चौपाई
suni jānakīṃ parama sukhu pāvā. sādara tāsu carana siru nāvā..
taba muni sana kaha kṛpānidhānā. āyasu hōi jāuom bana ānā..
saṃtata mō para kṛpā karēhū. sēvaka jāni tajēhu jani nēhū..
dharma dhuraṃdhara prabhu kai bānī. suni saprēma bōlē muni gyānī..
jāsu kṛpā aja siva sanakādī. cahata sakala paramāratha bādī..
tē tumha rāma akāma piārē. dīna baṃdhu mṛdu bacana ucārē..
aba jānī maiṃ śrī caturāī. bhajī tumhahi saba dēva bihāī..
jēhi samāna atisaya nahiṃ kōī. tā kara sīla kasa na asa hōī..
kēhi bidhi kahauṃ jāhu aba svāmī. kahahu nātha tumha aṃtarajāmī..
asa kahi prabhu bilōki muni dhīrā. lōcana jala baha pulaka sarīrā..
छंद
tana pulaka nirbhara prēma purana nayana mukha paṃkaja diē.
mana gyāna guna gōtīta prabhu maiṃ dīkha japa tapa kā kiē..
japa jōga dharma samūha tēṃ nara bhagati anupama pāvaī.
radhubīra carita punīta nisi dina dāsa tulasī gāvaī..
दोहा/सोरठा
kalimala samana damana mana rāma sujasa sukhamūla.
sādara sunahi jē tinha para rāma rahahiṃ anukūla..6ka..
kaṭhina kāla mala kōsa dharma na gyāna na jōga japa.
parihari sakala bharōsa rāmahi bhajahiṃ tē catura nara..6kha..
